1Ti 6 | MMX | STEP | Nedi lavasaxaruki, dina lok ngangao at luvuttadi amgomgo atdi, kusu kopmen teta noxo vaase xapmek ti laasen at ne Moroa la at levenanasa bok atnama.

1 Timothy 6

1 Nedi lavasaxaruki, dina lok ngangao at luvuttadi amgomgo atdi, kusu kopmen teta noxo vaase xapmek ti laasen at ne Moroa la at levenanasa bok atnama. 2 Lavasaxaruki at luvuttadi nuunu, nemen di guta lox amangan luvuttadi amgomgo, mila nedi vam loxoeton di. Ketla i lox avukat do dina lok lugugu avukat tidi, mila nedi di ru orong mumu lugugu atnedi nom luvuttadi amgomgo atdi. Una lox ase limixin mi na levelinga.

Leveloklox Ase Xaxarang

3 Do nege na anasa limixin mi levelinga vetpes, la kopmen na sixit eburu mi levelinga ruturun at Leeme Silok atdik ne Iesu Karisito, la eburu bok mi levenanasa at lotu atdik, 4 neni i umsu mi loklox asilok la kopmen naklen tevempanga. Lorooro ren kopmen na lox avukat; ni i vavara mun i xusu ni na etep mi levelinga la nak musak amisik; la na, i lox asuusu mun leretere mumu, lekarakat, la lavapaase xapmek, la lodoxoma xapmek; 5 la lumukmusak naba nemen alolos amisik kantubu atnedi la lodoxoma atdi ba lok kapmek tino. La di doxoma i do lotu ni langas tip novos.

Lapnovos Tuturun

6 Ketla do laradi i ruuna xobot ka vam leveloklok i nunuan la i lok momo mun mi mo lempanga i ruuna i, i lok ngan ta do neni ip novos aleng. 7 Levempanga salai dik taga rupot eburu min ti na lavatbung menemen? Kopmen! La levempanga salai dik ata ba xip kaka i basinge na lavatbung menemen? Kopmen! 8 Kuren la, mo do nedik ata ruuna levempanga anan mi levempanga singsiga, nom i epovo atdik. 9 Ketla nedi di vara i do dinap novos aleng, di ekip tangarang mi leveloklok tong pen la di vonon axa at lara pelixo atnedi limixin tangtangku la mo laxandoxoma xakapmek atnedi i lox asubu di ukopok ti losongsongot la labaava. 10 Lavavara pilas ni lavasuun tinotno at laxaloklok kakapmek. Leventaba diga vara aleng kusu dina ruuna ka i la dira vas basinge vam lunuunu atdi la dira ekip tangarang mi loklok tuntun at lorooro atnedi.

Levelinga Ri Ne Timoti

11 Ketla nenu, laradi at ne Moroa, una ru asepsu at nai levempanga. La una lolos ti loklok mokmokso at ne Moroa, lunuunu, labalamu, la loklok ti tu lolos kantubu at levenmumuat, la lixitkis atnaasan. 12 Unak sixit lolos at lekampoovo at lunuunu, kusu unaba ruuna ka mo lorooro i nemen amisik; ti mo mene lorooro ne Moroa ga ro ka u rin ap mo laaleng nenu ga vaase asu lunuunu ram to melamgo at limixin buaang. 13 At lemeren ne Moroa, neni im taba lorooro ri levempanga axap, la at lemeren ne Iesu Karisito, mo ga vaase mi luruturun to melamgo at ne Pontias Paelat; a sing lolos u do 14 una mu asu ruturun na levelinga la nemen uta ke taxakapmek na nemen at lorooro ram, se at lovotpot at Leeme Silok atdik ne Iesu Karisito. 15 Mo lovotpot teren naba vot akmokso at loxonaleng ne Moroa gara lok katling pam i; neni i umsu mi leveloklox anarong la neni xusuk mun lamgomgo atdik, Loorong Silok at lavaorong silok axap, la Leeme Silok ti lavaeme silok. 16 Neni xusuk mun naba roo avolo la i nemen keneng at langsangan laxasep la kovisi tara goxo ven tu ren, la tara noxo ven box i. Loklok ngangao xusuk tin eburu mi lololos amisik! Tuturun.

Levelinga Xavaxap

17 Una vaase axasep di dip novos aleng mi laxampanga at na lorooro do nemen ditak lox asilok di, la di noxo lok li lodoxoma atdi keneng at levenapnovos at na lorooro, mila lapnovos noxo nemen amisik; ketla dina lok li levendoxoma atdi at ne Moroa xusuk mun, mo im taba amisik dik mi levempanga axap ti lox amomo dik. 18 Una tong i ridi xusu dina lok mun luvukat, la dinap novos mi leven gugu nunuan, kusu dina episa levempanga atdi mi limixin petpes. 19 At na mun langas dinaba lok li bubua lapnovos silok, mo ba nemen tangais di, ngan loogu avukat at lorooro melemu, la dina ruuna ka nom lorooro, ni lorooro ruturun.

20 Timoti, una lok tatao avukat nom lugugu ne Moroa gara raba vam u min. Una ke xepe levelinga kopmen at ne Moroa, la levelinga rangtangku; leventaba di so asen mo levelinga do “Levelinga at lakleklen;” ketla kopmen nak mokso. 21 Leventaba di lok do di lok ka vam mo lakleklen la kerepmo dira lok kepe vam lunuunu atdi.

Letaba nabalamu at ne Moroa na nemen amisik eburu minu. I ruturun.